+994512060920
Bakı Metropoliteninin nəqliyyat sisteminin rəqəmsal transformasiyası və sərnişin axınının idarə edilməsi məqsədilə keçirilən 3 günlük layihə uğurla başa çatıb. Tədbirin baş sponsoru olaraq bu təşəbbüsdə yer almaq şirkətimiz üçün xüsusi əhəmiyyət daşıyır.
Metro Hackathon layihəsində iştirakçılar və real data üzərində iş
Metro Hackathon hazırlıqları çərçivəsində ölkənin 5 aparıcı universitetində 300-dən çox tələbənin iştirakı ilə məlumat sessiyaları keçirilib. Yarışmada hər biri təsadüfi seçilmiş 4 nəfərdən ibarət 18 komanda iştirak edib. Komandalar metro stansiyalarının adları ilə ("İçərişəhər", "Sahil", "28 May", "Gənclik", "Bakmil", "Ulduz", "Koroğlu", "Qara Qarayev", "Neftçilər", "Həzi Aslanov", "Xətai", "Cəfər Cabbarlı", "Nizami", "Elmlər Akademiyası", "İnşaatçılar", "Nəsimi", "Dərnəgül" və "8 Noyabr") çıxış ediblər. İlk iki gün ərzində "İçərişəhər" stansiyasında xüsusi yaradılmış zonada komandalar real metro datası üzərində süni intellekt (AI) mühəndisliyi və data analitikası istiqamətlərində öz həllərini hazırlayıblar.
Smart City standartları, hədəflər və qaliblər
Smart City layihələrinin tərkib hissəsi kimi gənclərin innovativ ideyalarının real infrastruktur həllərinə tətbiqi əsas hədəf olub. Mayın 3-də Bakı Metropoliteninin Texnoloji Korpusunda 5 peşəkar ekspertdən ibarət münsiflər heyəti qarşısında təqdimatlar keçirilib. Yekdilliklə 1-ci yerə layiq görülən "Xətai" komandası 5 000 AZN pul mükafatı qazanıb. İkinci yeri "Gənclik" (3 000 AZN), üçüncü yeri isə "Sahil" (1 000 AZN) komandası tutub. Qaliblərə və perspektivli iştirakçılara öz layihələrini metro sisteminə tətbiq etmək və gələcək karyeraları üçün əlavə təcrübə qazanmaq imkanı verilib.
Crocusoft olaraq rəqəmsal transformasiyaya dəstəyimiz
Crocusoft olaraq biz inanırıq ki, rəqəmsal transformasiya yalnız nəzəri ideyalarla deyil, real sistemlər üzərində qurulan həllərlə başlayır. Şirkətimiz GovTech, MobilityTech və ağıllı şəhər istiqamətlərində bu cür təşəbbüsləri dəstəkləməyə davam edəcək. Qalibləri və layihədə iştirak edən bütün gəncləri ürəkdən təbrik edirik.
